Ustozlik azaldan xalqimiz orasida eng sharafli va mas’uliyatli kasblardan biri hisoblanadi. Yurtimizda “Ustoz — otangdek ulug‘” degan hikmat bejiz aytilmagan. Har bir olim, muhandis, shifokor va rahbarning muvaffaqiyati ortida uning ongiga bilim, qalbiga ezgulik urug‘ini sepgan ustozning mehnati turadi.
Bugungi kunda mamlakatimizda amalga oshirilayotgan keng ko‘lamli islohotlar, jumladan, oliy ta’lim tizimini modernizatsiya qilish, ta’lim sifatini xalqaro standartlar darajasiga ko‘tarish va raqamli texnologiyalarni o‘quv jarayoniga joriy etish vazifalari professor-o‘qituvchilar zimmasiga yanada katta mas’uliyat yuklamoqda. Ustozlarimiz bu vazifalarni sharaf bilan bajarib, zamonaviy bilim va ko‘nikmalarni muntazam egallab bormoqda.
Institutimiz oliy ta’lim muassasalari rahbar va pedagog kadrlarining kasbiy mahoratini oshirish, ularni ilg‘or pedagogik va axborot texnologiyalari bilan qurollantirish yo‘lida faoliyat olib bormoqda. Har yili minglab professor-o‘qituvchilar malaka oshirish kurslarida yangi bilim va tajriba orttirib, ularni talabalarga yetkazmoqda. Bu esa ustozlik an’anasining uzluksiz davom etishidan dalolatdir.
Sizning fidokorona mehnatingiz, sabr-toqatingiz, bilim va tajribangiz yosh avlodning kamol topishida, yetuk va barkamol insonlar bo‘lib voyaga yetishida beqiyos ahamiyatga ega.
Sharafli kasbingizga doimo rivoj, qalbingizga quvonch, xonadoningizga fayz-u baraka tilaymiz. Ilm-ma’rifat yo‘lidagi ezgu faoliyatingizda ulkan muvaffaqiyatlar yor bo‘lsin! Sizga mustahkam sog‘liq, oilaviy baxt va shogirdlaringiz yutuqlaridan quvonish baxti nasib etsin!
Bayramingiz muborak bo‘lsin, aziz ustozlar!
Institut ma’muriyati va jamoasi
