Bugun Oliy ta’lim tizimi kadrlarini qayta tayyorlash va malakasini oshirish institutida O‘zbek tiliga davlat tili maqomi berilganining 37 yilligi munosabati bilan “QADRING BALAND BO‘LSIN, ONA TILIM!” mavzusida ma’naviy-ma’rifiy tadbir bo‘lib o‘tdi.
Tadbirda filologiya fanlari doktori, professor Karimov Bahodir Nurmetovich va filologiya fanlari nomzodi, dotsent Xolova Muyassar Abdulhakimovna ishtirok etdilar. Ular o‘z ma’ruzalarida o‘zbek tilining milliy tafakkur va ma’naviyatni shakllantirishdagi o‘rni, tilimizning boy imkoniyatlari hamda raqamli texnologiyalar davrida tilshunoslikning rivojlanish istiqbollari haqida so‘z yuritdilar.
Davra suhbati davomida ona tilimizni e’zozlash, uning nufuzini oshirish, sofligini asrash va zamonaviy taraqqiyot talablariga mos ravishda rivojlantirish masalalari yuzasidan fikr almashildi.
Til – millat ko‘zgusi. Uni asrash, rivojlantirish va kelajak avlodga yetkazish barchamizning muqaddas burchimizdir.
