To‘plamda nutqning besh asosiy yo‘nalishi, ya’ni inson qadrining davlat siyosati markazida ekani, Yangi Toshkentning ilm-fan va ma'rifat markaziga aylanayotgani, islohotlar natijalari, kelgusi o'n yillikning “milliy yuksalish davri” deb e’lon qilingani hamda tinchlik va hamkorlik siyosati yoritilgan. Shuningdek, al-Xorazmiydan Amir Temurgacha bo‘lgan buyuk ajdodlarimiz va jadid bobolarimiz merosiga alohida sahifalar bag‘ishlangan.
Kitobda 1991–2025-yillar oralig‘idagi o‘zgarishlar grafik va diagrammalar orqali ko‘rsatilgan. Xususan, 35 yil ichida iqtisodiyot hajmi 10,7 barobar, aholi jon boshiga daromad 6 barobar oshgan. Kambag‘allik darajasi 2017-yildagi 35 foizdan 4 foizga tushirilib, 10 million insonning turmush sharoiti yaxshilangan. O‘rtacha umr ko‘rish davomiyligi 66,4 yoshdan 75,4 yoshga yetgan. Yiliga jalb qilinayotgan xorijiy investitsiyalar hajmi ilgarigi 2–3 milliard dollardan 40–50 milliard dollarga ko‘tarilgan.
Ta'lim sohasiga oid ko‘rsatkichlar ham alohida e’tiborga loyiq. Bog‘cha yoshidagi bolalarni maktabgacha ta’lim bilan qamrab olish 78 foizga yetgan, maktablarda 1,5 million qo‘shimcha o‘quvchi o‘rni yaratilgan. Oliy ta’lim muassasalarida tahsil olayotgan talabalar soni 1 million 600 mingga yetgan bo‘lib, ularning yarmidan ko‘pini xotin-qizlar tashkil etadi.
Nashrning muhim qismi kelgusi o‘n yillikka mo‘ljallangan yettita milliy dasturga bag‘ishlangan:
- Bilim va malakani taraqqiyotning asosiy kapitaliga aylantirish;
- Xalqning sog‘lom bo‘lishi va uzoq umr ko‘rishini ta’minlash;
- Iqtisodiyotni yuqori texnologiyalar va mehnat unumdorligi modeliga o‘tkazish;
- Suv va tabiatga munosabatni tubdan o‘zgartirish;
- Sud mustaqilligini kuchaytirish va qonun ustuvorligini umumiy qadriyatga aylantirish;
- Mahallani jamiyat taraqqiyotining asosiy buyurtmachisiga aylantirish;
- O‘zbekistonning tinchlik va do‘stlik diyori, bag‘rikeng o‘lka sifatidagi nufuzini yuksaltirish.
Ta’lim tizimi uchun birinchi dastur alohida ahamiyatga ega. Unda 6 yoshli bolalarni tayyorlov guruhlari bilan 100 foiz qamrab olish, barcha maktablarni xalqaro baholash dasturlariga jalb etish, texnikumlardagi o‘quvchilar qamrovini 1 millionga yetkazish hamda kamida 10 ta oliy ta’lim muassasasini dunyoning TOP-1000 reytingiga kiritish vazifalari belgilangan.
Smart-kitobning afzalligi shundaki, sahifalardagi QR-kodlar orqali tegishli video materiallar va qo'shimcha manbalar bilan tanishish mumkin. Nashr professor-o‘qituvchilar, rahbar kadrlar, talabalar va keng jamoatchilik uchun ma’naviy-ma’rifiy tadbirlar, darslar va targ‘ibot ishlarida qo‘llanma bo‘lib xizmat qiladi.
📄 Prezident nutqining to'liq matni: https://president.uz/oz/lists/view/9544
Manba: "Taraqqiyot strategiyasi" markazi
